US synagogue-a hrente him takin chhanchhuak

US-a silai keng mi pakhatin synagogue-a mi a hrente chu darkar 10 hnuah police-te'n an vaiin him takin an chhanchhuak a, a hrengtu hi an kaphlum a ni.

Kar liam ta Inrinni zing khan Texas state-a Colleyville-a Congregation Beth Israel synagogue-ah inkhawm laiin silai keng mi pakhat hian luhkhungin mi pali te a hreng zui a, an zingah hian rabbi pawh a tel. Darkar ruk hnuah an zinga pakhat chu a chhuah tir a, mahse midang pathumte erawh a hreng zui a ni.

Police-te chuan synagogue-ah hian special weapon team an tir nghal a, FBI aiawhte pawhin mi hrengtu hi an be bawk a, mahse a chhuah tir duh loh avangin an FBI Rescue Team hi synagogue chhungah lutin a mi hrente hi an chhanchhuak a,amah pawh kahhlum a ni tih Colleyville police hotu Michael Miller chuan a sawi.

Silai kengin a luhkhung lai hian synagogue-a inkhawm hi online-a pek chhuah a ni a, lo thlirtute pawhin a thusawite hi an lo hre thei a ni. US-a tang mek, Pakistani neuroscientist Aafia Siddiqui chu jail aṭanga chuah turin a phut a ni. Siddiqui hi Aghanistan-a a awm laia US sipai officer thah tuma puhin thiam loh chantir a ni.