Taliban sorkar hnuah a vawi khatna atan ATM service tinung

Afghanistan-a Taliban-ten sorkar an siam hnuah a vawi khatna atan kar liam ta Inrinni khan commercial bank-te chuan ATM service an tinung ṭan ta.

Commercial bank leh bank union-ten ṭum eng emaw zat inbiakna an neih hnuah ATM service hi tihnun ṭan leh a ni tih Central Bank of Afghanistan, Da Afghanistan Bank (DAB) chuan a sawi. Nikum August thlaa Taliban-ten thuneihna an chan aṭang khan ATM service hi tihtawp nghal a ni.

ATM hi hman theihin hawng leh mah se, policy thar an siamah mi pakhatin kar khatah USD 200, Afghani 20,000 chin bak an lachhuak thei lo.

Hetih lai hian Taliban chuan Afghan mipuite chu a hun takah chhiah pe turin a hriattir. Second deputy prime minister Abdul Salam Hanafi chuan an ramin sum lama harsatna a tawh mek puihna turin, chhiah pek ngaite chu a hun taka pe vek turin a ti. Chhiah an pekte chu education leh health sector atan an hmang dawn tih Hanafi chuan a sawi nghal bawk.