US war hero leh politician Senator John McCain a thi

US Senator John McCain, Vietnam war hero leh presidential candidate hlui chu kum 81 mi niin Inrinni tlai dar 4:28 khan Arizona-ah a thi.

John McCain hi kum 2017 July thla khan brain tumour a nei tih hriatchhuah a ni a, radiation leh chemotherapy hmanga enkawl zui reng a ni. Kar kalta Zirtawpni khan McCain-a chhungte chuan a enkawlna hian awmzia a neih tawh loh avangin tihtawp an rel a ni. McCain hian a nupui Cindy leh fa pasarih a kalsan.

Arizona aṭanga senator term ruk chelh thei leh, kum 2008 US president thlanaa Repubican presidential nominee, John McCain-a ruang hi Phoenix, Arizona leh Washington DC-a dah phawt a ni dawn a, a vuina hun hi Washington National Cathedral-ah neiin, Annapolis, Maryland-ah phum a ni ang. A vuina inkhawmah hian US president hlui Barack Obama leh George W Bush-ten uina thu an sawi ang. A vui ni tur hi sawichian a la ni lo.

McCain-a pa leh pu hi Navy admiral ve ve an ni a, Vietnam indo lai khan telin fighter pilot a ni. Kum 1967 khan a thlawhtheihna hi kah thlaksak a ni a, man tawkin kum nga chuang zet a tang zui a ni. A tan lai hian nghaisak a tawk nasa hle a, pianphunga rualban lohna a neih phah hial. A tan lai hian man anih hmaa America mi mante chhuah vek an nih hmasak hma chuan tan-in aṭanga chhuahtir a duh lo. Kum 1973-ah Paris Peace Accord siam hmangin chhuah a ni ta chauh a ni. Mi huaisen, kalphung nghet tak nei a nih avangin mite ngaihsan pawh a hlawh hle.

John McCain thih thu an hriat veleh mi hrang hrangin uina thu an sawi nghal. President hlui George W Bush chuan McCain chu ram hmangaihtu dik tak, mipui rawngbawltu a ni tiin, a ngai dawn hle tih a sawi. Kum 2008-a Republican president candidate a chuhpui, Sarah Palin pawhin a ui thu sawiin, khawvel chuan America mi dik tak a chan ta a ni, a ti.

President Donald Trump pawhin McCain-a chhungte a tawrhpui thu a sawi a, White House US flag zar pawh McCain sunnan a ngul chanve-ah tihhniam a ni. Hetihlai hian John McCain kha President Trump duh loa sawisel fotu a ni a, Trump-a pawh hian a sunna thu a sawiah pawh McCain chungchang a sawilang lo a, a chhungte a tawrhpui thu chauh a sawilang a ni. McCain vuina inkhawmah pawh Trump hi an sawm lo mai thei nia sawi a ni a, sorkar aiawhin Vice President Mike Pence zawk a kal dawn nia sawi thawm pawh a awm.

Kum 2008 US President thlannaa McCain-an a hnek tak lo, President hlui Barack Obama chuan McCain nen chuan ngaihdan hrang te nei mah se, America ṭhangtharte dinhmun ṭha zawka siam a, pemlutte pawh ang khata ena dinhmun ṭha zawka dah duhna rilru pu ve ve an nih thu a sawi. Vice President hlui Joe Biden chuan John McCain chu mi huaisen, zahawm leh thudik nunpuitu a ni, a ti.