Zimbabwe eptuten inthlan result an hnawl

Zimbabwe ram eptu pawl, MDC Alliance party chuan July thlaa President thlanna result, court-in a pawmpui chu an pawm ve thei lo tih an sawi. He inthlanah hian Zanu-PF party candidate Emmerson Mnangagwa thlan tlin a ni.

President thlannaa eptu pawl, MDC Alliance party candidate Nelson Chamisa inthlanah hian dan ang takin amah zawk chu thlan tlin a nih thu a sawi a, lungawi lohna lantir an tum thu a sawi nghal bawk. Eptuten inthlanah thil dik lo awmin, vote tihchingpen nia an sawi chungchang hi kar kalta Zirtawpni khan constitutional court chuan hnawlin, finfiahna engmah a awm loh thu a sawi a, Emmerson Mnangagwa chaka puanna chu a pawm thu a sawi a ni.

Court-in thutlukna a puan hnuah Chamisa chuan an ram khawpui, Harare-a chanchin thar lakhawmtute a kawmnaah court rorel dan chu mipuite duh dan a ni lo tih a sawi. Dikna chanvo an neih angin boruak ṭha tak hnuaiah lungawi lohna lantir an tum tih a sawi. President Mnangagwa lakluh inkhawmah pawh a tel dawn loh thu a sawi bawk.

Mnangagwa hian July thlaa inthlanah hian president tling tura vote hmuh ngai zat, vote tla aṭanga 50% chu vote 20,000 chauha khumin 50.7% a hmu pha a, inthlan nawn ngai loin a tling hram a ni. A tlinna vote hi a tlem tham avangin eptu lam chuan a rinhlelhawm niin an sawi.

Mahse Chief Justice Luke Malaba chuan inthlan felfai lo leh khawih chingpen nia sawi chu thil dik lo leh thu awmze nei lo niin a sawi. European Union pawhin eptute chu inbengdai turin a ngen a, US pawhin party hrang hrangte chu an ram danpui chu zah turin a ngen bawk. Inthlan neihpuitu, international election observer-te chuan inthlan buatsaih a nih dan chu an fak hle a ni.