Pakistan airport-ah VIP protocol titawp

Pakistan Prime Minister thar Imran Khan-a kaihhruai sorkar chuan an ram chhunga airport zawng zawngah VIP protocol a titawp.

Pathianni aṭang khan airport-a VIP-te hnena special security leh duhsakna dang pek ṭhinte chu tihtawp ṭan a ni. Information Minister Fawad Chaudhry chuan khualzin zawng zawngten inthliarhranna awm loa enkawlna inang tlang vek an dawn theihna turin he thutlukna hi siam a nih thu a sawi.

Ram dang tam tak ang bawkin Pakistan-ah hian VIP-te hi airport-ah duhsak bik an ni ṭhin a, khualzin dangte anga a intlar ve te a ngai lo ṭhin. Mahse sorkarin dan thar a siam tak avang hian airport official zingah khualzin lo duhsak bik an awm chuan hremna na tak pek theih an ni tawh zawk dawn a ni. Hetihlai hian sorkar hmasa pawh khan he ruahmanna hi kalpui turin a lo puang ve tawh tho a, a taka kalpui a ni zui lo a ni.

Pakistan Tehreek-i-Insaf (PTI) kaihhruai sorkar thar hian inrenchemna kalpui a tum thu a lo sawi tawh a, hemi atana a hmalakna kawng khat atan official-te chu thlawhtheihnaa first-class a an zin khapsak an ni.

Cabinet chuan meeting vawi hnihna a neihnaah he thutlukna hi a siam a, first class air travel khapsak zingah hian President, Prime Minister, chief justice, Senate chairman, National Assembly speaker leh chief minister-te an tel. Heng offiial-te hi international flight-ah first class-a an zin khapsak an ni a, business emaw club class-ah emaw an chuan a ngai tawh dawn a ni.

PM Imran Khan pawhin rampawn lama a zin chhuahnaah a special plane hmang loin, business class-ah a kal ṭhin tur thu alo sawi tawh bawk.