Florida-a video game tournament-ah mi pahnih kaphlum

US-a Florida state-a Jacksonville-ah video game tournament neihna hmunah Pathianni tlai khan mi pahnih kahhlum an ni a, pawikhawihtu hi a inkaphlum zui ve leh nghal bawk. Midang 11 in hliam an tuar a ni.

Police-te chuan silai hmetpuaktu hi kum 24 mi, David Katz a nih thu an sawi a, midang inhnamhnawih an awm lo niin an sawi. Entertainment complex, Jacksonville Landing-ah tournament neihna hmunah a chak loh hnua a thinrim chuan silai a hmetpuak ta nia sawi a ni.

Florida state-ah hian inkahna a thleng fo a, kum 2016 khan Orlando-a Pulse nighclub-a inkahna thlengah mi 49 an thi a, kumin February thla khan Parkland-a Marjory Stoneman Douglas School-a inkahna thlengah mi 17 an thi bawk.

Pathianni khan Jacksonville Landing-ah GLHF Game Bar-ah American football game Madden NFL 19 khelh a ni a, he inelna Bar hian live-in a tichhuak a ni. Baltimore mi, he tournament-a tel David Katz chuan a chak loh hnuah gamer dangte chu a kap ta niin police-te chuan an sawi. Hliam tuarte hi damdawi-in panpui nghal an ni.