Zimbabwe President thar lalut

Zimbabwe President atana thlan thar, Emmerson Mnangagwa chu President kum nga term chelh turin Pathianni khan rinawmna thu tiamtir lakluh a ni.

Chief Justice Luke Malaba chuan President thar hi rinawmna thu a tiamtir a ni. President thar lakluh inkhawm hi an ram khawpui, Harare-a National Sports Stadium-ah neih a ni. Mnangagwa hi kum 1987-a an ram danpui siamṭhat a nih hnuah Zimbabwe ram President pathumna a ni.

President atana lakluh a nih hnua thu a sawina hmasa berah, Mnangagwa chuan dan hmaah mipuite chu ang khat vek an ni thu sawiin, an rama eirukna umbo tura theihtawp a chhuah tur thu leh, eirute chu thubuai siamsak zel an nih tur thu a sawi. Mipuite rawngbawltu leh chhiahhlawh zawk a ni tih sawiin, sorkar hnathawkte pawhin mipuite rawngbawltu an ni tih an inhriatchian a ngai a ni, a ti.

Zimbabwe eptu pawl chuan inthlan result hi an pawm lo tih sawiin, vote tichingpen niin an sawi. Mahse Constitutional Court chuan kar kalta Zirtawpni khan eptute complaint leh, eptu candidate Nelson Chamisa chaka puang tura an phutna chu a hnawlsak a ni. July 30-a president thlanna neihah khan Mnangagwa hian vote tla aṭanga 50.67% hmuin, Chamisa hian 44.3% a hmu a ni.