Facebook-in Myanmar sipai hotu account tihtawp sak

Facebook chuan Myanmar ram sipai hotu Senior General Min Aung HIang leh mimal leh pawl dang 19-te chu inhuatna lam hawi thu leh thu dik tawk lo an thehdarh ṭhin venna turin an page leh account-te a tihtawpsak.

Facebook hi chi leh sakhua inhuatna lam sawichhuahna atan hman a ni fo a, a bikin Rohingya Muslim-te chungchang sawiselna atan an hmang fo a ni. Hei vang hian Facebook chuan Rohingya Muslim-te beihna atana hman ṭhin Facebook account 18 leh page 52 a tihtawp sak a, hei bakah hian instragram account pakhat tihtawp a ni bawk.

Kar hmasa khan Reuters global invetigative reporter Steve Stecklov chuan Rohingya-te beihna chungchanga post, thlalak leh comment 1,000 a awm thu hmuhchhuah a ni tih a sawi a, Myanmar-ah hian Facebook hmangtu hi mi maktaduai tel awmin an zinga tam tak hian chanchinthar an lakna bera atan an hmang a ni, a ti. Kum 2014 July thlaa Rohingya-te chungchanga thu dik tawk lo thehdarh a nih

aṭang khan tharum thawhna pawh a thlen phah niin a sawi.

Myanmar khawthlang lam, Rakhine state-ah sipaiten beihpui an thlak hnuah Rohingya mi tam tak chu Bangladesh ramah an tlanchhia a ni. Sipaite chetdan hi ram hrang hrangten an dem thu an sawi a, sipaite chuan Rohingya hel chauh an bitum niin sawi mah se, international group-te chuan Rohingya hnam nawlpui bei leh, thenfai hna thawh tumah an puh thung.