Theresa May-in Africa tlawh kual dawn

UK Prime Minister Theresa May-i chu ni thum chamin Africa ram pathum tlawh turin nimin khan a zinchhuak. Kum 2016 hnu lama British ram hruaitu dinhmun a chelh hnuah Africa khawmuala a zinna hmasa ber a ni.

May-i hi minister eng emaw zat bakah sumdawng aiawh 29 ten an zui a, South Africa, Nigeria leh Kenya-te an tlawh ang. Kum 1988-a Margaret Thatcher-in a tlawh hnuah British PM zingah Kenya ram tlawh leh hmasa ber tur a ni dawn bawk.

Nimin khan Cape Town an pan a, May-i hian South Africa President Cyril Ramaphosa bakah sumdawng hotute leh ṭhalai aiawhte a kawm a ni. May-i hian kum 1917-a English Channel-a pil, sipai lawnglian-a dar(bell) chu Ramaphosa hi a present. He lawngah hian Indopui I hunlaia ṭangrual sipaite zawm tura kal, Africa sipai 600 chuang an chuang a ni. British PM hian SAfrica president hlui, Nelson Mandela-a kum tam tak tantir a nihna hmun, Robben Island pawh a tlawh nghal bawk.

Vawiin hian Nigeria ram panin, President Muhammadu Buhari nen Abuja-ah meeting an nei dawn a, hemi hnu hian Lagos-a tlawh ang. Naktukah Nigeria aṭang hian Kenya panin, Kenya President Uhuru Kenyatta a hmu dawn a, Kenya rama British sipai awmte hmuin, business school a tlawh bawk ang.