Sept 14-ah state chawimawina nen Kofi Annan vui dawn

United Nations secretary general hlui, Kofi Annan chu September 14 hian Ghana-ah state chawimawina nen vui a ni dawn tih Ghana President Nana Akufo-Addo chuan a sawi.

Ghana ram mi, UN hotu hlui leh Nobel Prize pawh lo dawng tawh Anna hi August 18 khan kum 80 mi niin Switzerland-ah a thi a ni.

Ghana President Akufo-Addo chuan Kofi Anna chu tunlai huna mi ropui tak pakhat a ni tih sawiin, a tan chuan a u ang mai a nih thu a sawi. A vuina hi ropui taka buatsaih tum a nih thu sawiin, ram hrang hrang hruaitute pawh an tel a beisei thu a sawi.

Ghana-a Ashanti bial khawpui, Kumasi-a piang Kofi Anna hi kum 40 dawn chu UN tan thawkin, sub-Shaharan Africa aṭanga UN hotu dinhmun chelh thei hmasa ber a ni. Switzerland-a a thih hnu hian Ghana chuan an ramah kar khat chhung a sunna hun hi an hmang a ni.