Greece-in kum 60 chunglam Covid-19 vaccine la lo thlatin pawisa a chawitir tawh dawn

Greece chuan nimin aṭang khan an rama puitling kum 60 chin chunglam, Covid-19 vaccine la lote chu thlatin pawisa a chawitir dawn. Hei hi vaccine semchhuah kawnga chak zawka hma lakna tur leh, health care lama nawrna awm ṭhin tihziaawmna tura tih a ni.

Prime minister Kyriakos Mitsotakis chuan sum an chawi lohna tur kawng awlsam ber chu vaccine lak mai a nih thu sawiin, "Kan ram mipui kum 60 pel tawh vaccine la lo tlemte ho khan vawiin hian ke rawn pen chhuak turin ka sawm che u a ni," a ti.

PM chuan, "Lei inchawitir lam a ni lo a, pawisa chawi tir chu tih theih awmchhun chu a ni mai. Nangmahni leh inhmangaihte nunna veng ṭha ula, vaccine hi a him tawk tih in hriatthiam a ngai a ni" a ti. Greece thuneitute chuan vaccine la ve lote chu coronavirus an kai palhin damdawi-in panpui ngai khawpa an awm theihna chance a san thu an sawi.

Greece rama Covid kaihhnawih vanga thi mi sawm zinga pakuate chu kum 60 leh a chunglam an ni a, hri kai damdawi-ina dahluh ngai mi 10 zela pasarih chu kum 60 chunglam an ni bawk. Heng zinga mi 10 zela mi pariat chu vaccine la lo an ni.

Nikum November thlaa vaccine lak vekna tur dan an siam hma khan senior citizen 5,20,000 velin vaccine an la la lo tih Health Ministry data chuan a tarlang. Dan an kenkawh hnu hian mi nuai hnih chuangin vaccine an la leh tawh a, a bak mi nuai thum vel zinga ṭhenkhat chu taksa lama harsatna an neih avangin ngaihhnathiam an ni thei dawn a ni.

Kum 60 chin chunglam vaccine la duh lote hian thlatin euro 100($114) an chawi dawn a ni. Pawisa tlingkhawm hi Greek tax authority kutah lutin, hri leng dona atan damdawi-in thuam chakna tura hman a ni ang. Sorkar thupuangtu Ioannis Oikonomou chuan kar liamta Ningani khan vaccine la duh lote chhuanlam siam chu engmah an pawm theih tawh loh thu a sawi.

Europe ram dangte ang bawkin, Omicron variant vangin Greece pawh hian hri kai thar tam lamah record a siam chho reng a ni. Covid kaihhnawih vanga thihna chu hri leng dang ang bawkin an pung chho mek bawk. Greece-ah hian mipui hmun thuma ṭhena hmun hnih velin vaccine dose kim an la tawh a, EU ramdang te nena khaikhin chuan vaccine la zat hi an la hniam zawk a ni.