China-ah nau piang tlem ber ṭum thleng

China chuan nikum 2021 khan record thar siamin, kum khat chhunga nau piang zat chu 7.52% zetin a tlahniam tih National Bureau of Statistics data chuan nimin khan an tarlang. Statistics bureau-in kum 1949 aṭanga birth rate data an lakkhawm hnua kum khata nau piang an tlem ber ṭum a ni.

Nau piang tlahniam zel vang hian Beijing khawpui chuan nikum aṭang khan nupa tuakte chu fa pathum thleng neih a lo phalsak tawh a ni.

China hian fa pakhat chauh neih phalna, one-child policy chu kum 2016 khan a lo hlip tawh a, an ram mipui zinga kum upa an ṭhahnem tawh zawk avangin fa pahnih neih phalna an pe a, mahse hei hi khawpui chhunga khawsak man sang chak tak avangin nupa tuak tam takte chuan fa pakhat aia tam neih an zuam tawh lo tih an sawi.

China rama mipui ṭhan chak zawng, ramdang aṭanga rawn lut chhiar tel lohin, kum 2021 chhung khan 0.034 a ni a, kum 1960 hnua a hniam ber ṭum a ni. "Kum 2021 khan China mipui tam lai ber kan thleng tawh tih a lantir a. China-a mipui pun chak zawng hi kan rin lawk aiin a tlahniam chak a ni," tiin Pinpoint Asset management-a chief economist Zhiwei Zhang chuan a sawi.

Data aṭanga a lan danin, kum 2021 chhung khan nau piang maktaduai 10.62 awmin, 2020 khan maktaduai 12 an awm thung. Kum 2020-a birth rate chu mi 1,000 zelah 8.52% a ni.