Taliban-in March-ah school leh university hawn phalsak

Afghanistan-a rorellai, Taliban sorkar chuan March thla aṭangin mipa leh hmeichhiate tan school leh university-te hawn phalsak a nih thu Pathianni khan a sawi.

Deputy minister of information and culture leh Taliban sorkar thupuangtu, Zabiullah Mujahid chuan Taliban-te chuan zirna an dodal lo a, mahse school-ah pawh mipa leh hmeichhiate chu an awm hrang tur a ni, a ti. Ministry of education leh ministry of higher education chuan thla hnih hnuah higher school leh open university-te hawn an nih theihna turin hma an la mek a ni, a ti.

Nikum August thlaa Taliban-te thuneihna an chan hnu aṭang khan Afghanistan ram hmun hrang hranga public university 150 chuang khar an ni.