China-in US, UK leh Australia vau

China chuan Hong Kong chungchangah US, UK leh Australia ramte chu inrawlh lo turin a ti a, an inrawlh a nih chuan na taka chhang let a hreh loh thuin a vau.

Nilaini khan US House of Representatives chuan Hong Kong-a China-in national security law a hman chungchangah Chinese official-te thawhpui tawh lohna tur bill a pass a ni. He bill hi kar liam ta khan Senate-in voice vote hmangin an pass tawh a, House of Repre­sentatives hian tlem an tihdanglam hnu pass-in, Senate-ah thawn leh a ni a, dana hmang turin president Donald Trump hming sign chiah nghah a ni tawh bawk. 

Nilainia khan Australia prime minister Scott Morrison chuan Hong Kong mite an ram mi an nih theih dan tur an ngaihtuah dawn thu a lo sawi ve bawk. Britain prime minister Boris Johnson pawhin Hong Kong mite tan British khua leh tui an nih theih dan tur kawng hawnsak a ni dawn tih a lo sawi tawh bawk a ni. 

Hengte avang hian China chuan a bikin ram pathumte hi inrawlh lo turin a ti a ni. Ram dang ten China an sawisel chhan hi July 1-a Hong Kong-a national security law a hman ṭan vang a ni. Heng ram pathumte bakah ram dangte chuan he law hian Hong Kong mite zalenna a rapbet nia sawiin, China hi an sawisel rawn a ni. Hei vang hian China chuan an ram chhung thila inrawlh lo tur leh, an inrawlh a nih chuan na taka chhang let a hreh loh thuin a vau zui ta a ni.