Myanmar-in UN report pawm lo

Mynmar sorkar thupuangtu chuan United Nations investigator-ten Rohingya Muslim-te chunga thil thleng chungchang an chhuinaah, Myanmar sipaite chu Rohingya mipui nawlpuite suatah an puhna chu an pawm lo tih a sawi.

UN report chuan Rohingya mi tam tak tihhlum an nih vang hian Myanmar sipai official-te chu thubuai siamsak an phut thu a tarlang a ni. Mahse sorkar thupuangtu, Zaw Htay chuan Human Rights Council-in Rohingya chungchanga resolution a siam reng reng chu an pawm lo tih a sawi.

Myanmar hian UN investigator-te hi an rama an luh a remti lo a, hei vang hian resolution an siam pawh an pawmsak thei lo tih a sawi a ni. Myanmar chuan human rights palzutna reng reng a pawm lo tih a sawi a, UN leh pawl dangten dik lo taka Myanmar an puhna chungchang chhang let tur hian Commission of Enquiry pawh din a ni, a ti. Kumin kumtir lam kha thuneitute chuan panel hi dinin, local member pahnih leh international member pahnih–Philippine diplomant Rosario Manalo leh Japan UN ambassador hlui Kenzo Oshima-te dah an ni.

Myanmar sorkar chuan sipaiten human rights palzutin, Rohingya mipui nawlpuite laka beihpui an thlak nia puhna hi a pha a, sipaite hian ramri-a police post beitu Rohingya helte chauh an bitum niin a sawi a ni.