Puerto Rico-a Hurricane Maria thleh vanga thi 2,975 an tling

Puerto Rico official-te chuan kum 2017 September thlaa thlipui na tak, Hurricane Maria tlehin chhiatna a thlen vanga thi chu mi 2,975 an nih thu a sawi.

Thlipui tleh vanga thi hi a tirah chuan mi 64 nia sawi a ni a, mahse thil awmdan enfiah a nih hnua official record tihchhuahah thi zat hi a tira an sawi aiin a let 50 zetin an tam ta a ni.

Governor Ricardo Rosello chuan hun rei tak independent investigation hi an nghah hnuah, an thil hmuchhuah leh report hi an pawm tih a sawi. Thi zat hi update turin thupek pawh a tichhuak nghal tih a sawi.

Hurricane Maria-in thil a tihchhiatte din thar leh tur hian Puerto Rico chuan hma a la chhunzawm zel a, US Congress-ah recovery fund dollar tluklehdingawn 139 a dil a ni. US President Donald Trump chu thlipui tuartu dang, Texas leh Florida-te ngaihsak a, Puerto Rico tawrhna ngaihsak tawk loa puhin sawisel pawh alo tawk tawh a, sorkar laipui chuan kum 90 dawna Puerto Rico bialin thlipui a tawrh nat ber, Hurricane Maria tlehin thil a tihchhiat dangte report ṭha tawk loa puh a ni bawk.

Puerto Rico-a chhiatna thleng vanga thi hi official record-ah chuan 64 chauh a ni a, mahse thliarkar thuneitute chuan hei ai hian an tam zawk hle niin a sawi. Expert ṭhenkhat pawhin thi zat hi 4,600 vel niin an lo chhut tawh bawk a ni. Kum khat dawn chu thliarkar thuneitute chuan thlipui tleh vanga thi hi mi 64 niin a chhinchiah hman a ni.

Thlipui tleh vanga thi, official record tihchhuah thar a nih leh tak vangin Puerto Rico hian Congress aṭangin an indinthar lehna tur sum tam tham tak a dawng thei dawn ta a ni. Carribean thliarkarah hian US citizen maktaduai 3.3 vel an awm a, mahse an zinga 8% chuan thlipui tleh hnu hian an chhuahsan tawh a ni.