UN General Assembly-ah Imran Khan tel dawn lo

Pakistan Prime Minister thar Imran Khan chuan an ram economy siamṭha tura hna thawh nghal a duh avangin thla thar United Nations General Assembly neih turah pawh a tel thei dawn lo niin Foreign Minister Shah Mehhmood Qureshi chuan a sawi.

September 18 aṭanga 73rd UN General Assembly neih turah hian Pakistan palaite chu minister Qureshi chuan a ho zawk dawn a ni.

Imran Khan hian PM atana lakluh a nih hnuah an ramin leiba a ngah lutuk tihziawmna tura inrenchemna kalpui a nih tur thu leh, an ram sum leh pai dinhmun siamṭha tura a beih tur thute a lo sawi tawh a ni.

PM hian eiruk do beihpui thlak a tum thu a sawi bawk a, thutiam hlenna tur kawng atan hian Thawhlehni khan ram pawn lama sum chheprelhte lakkir dan tur ruahmanna siam turin task force chu karhnih hun a pe. Thawhṭanni khan task force hian meeting hmasa ber an nei a, sorkar department hrang hrang hnenah ram pawn lama sum chheprelh leh sum tihchingpen thubuai tikhawtlai mek chungchangte an hriattir.