June thlaah US-a hna hmu mi mtd 4.8 awm

Bureau of Labor Statistics chuan Ningani khan June thla chhungin US-a hna hmu mi maktaduai 4.8 an awm thu a tarlang a, hei vang hian US-a unemployment rate chu 11.1% in a tlahniam a ni.

US-ah hian March thla aṭang khan Covid-19 hri leng vang hian sumdawnna tam tak chu khar lailawk a ni a, hei vang hian hna chan an tam phah a ni. Hri leng vanga US-a hna chan hi mi mtd 20 chuang an awm hman a, kum 1930-a Great Recession a thlena hna chan ai  khan kumina hri leng vanga hna chan hi an tam zawk thu mithiam ṭhenkhatte chuan an sawi.  

Economist ṭhenkhatten an lo sawi lawk aiin hna hmu hi an tam a, restaurant leh bar bakah sumdawnna dangte pawh hawn chhoh mek zel a ni. Hei vang hian mi tam takin hna an hmu leh thei a, zawimuangin a ziaawm chho leh turah mithiamte chuan an ngai bawk. Hri leng vanga inkharkhipna leh mi tam zawkten hri an kai theihna tur laka an inven nana an sumdawnna leh an eizawnnate an ṭulh lailawk a ngaih avang khan industry sector chuan a tuar nasa

ber nia sawi a ni. 

Hetih lai hian Ningani khan US-ah ni khat chhunga hri kai tam ber ni a thleng a, hri kai thar mi 55,274 an awm a ni. Hei hi khawvel huap ang zawng pawn ram pakhata ni khat chhunga hri kai tam ber ni a ni bawk. Kar hnih liam ta khan nitin US-a hri kai thar hi a tlangpuiin mi 22,000 vel an awm ṭhin. US-a hri kai tawh hi mi 28,37,189 an awm a, heng zinga mi 11,91,091 chu enkawl dam tawh niin, he hri vanga thi hi mi 1,31,485 an awm tawh bawk.