Myanmar Dam chim vangin tuilianin khaw 85 a chim

Myanmar rama Swar Chaung dam chim vangin thingtlang khaw 85 chu tuilianin a chim a, kawngpui pawimawh pawh a chim tel a, mi 63,000 vel chu hmun him lamah an insawnchhuak.

Nilaini khan Sar creek-a irrigation dam hi a chim a, hei vang hian Swar leh Yedahse inkara thingtlang khaw hrang hrangte chu dam aṭanga tuilian hian a chim a ni. Nimin zing khan tuilian hian kam lam a pan tawh a, mahse tuilian hian mi eng emaw zat a len nia hriat a nih thu Yedashe deputy administrator Min Thu chuan a sawi.

Tuilian vang hian thingtlang khaw tam taka chengte chu himna zawngin hmun sang lamah a tlanchhia a, nimin khan an khaw lamah hian an kir leh ṭan. Tuilian hian Yangon leh Mandalay leh Naypyitaw inkar traffic pawh a tibuai a, heng khawpui inkalpawhna lei chu tuilian hian a tichhe tel a ni.

Nimin zing aṭang khan dam siamṭhat hna hi thawh nghal a ni a, tui pawh a phai hman hle a ni.

Irrigation official Kuang Myat Thein chuan ṭhal a ṭhlen hmain reservoir-a tui dah khat chu tihtur hmasa a nih thu a sawi a, dam chhiat chhan pawh chhui a ni dawn tih a sawi bawk.

Dam bang chhiat hma hian thuneitute chuan Swar-a dam hi a ṭha tawk a, tui pawh 216,350 acre-feet a dawng thei niin an sawi. Kaung Myat Thein chuan he dam hi endik fo a nih thu a sawi.

Dam chim hian thlai leh buh chinna ram zau tak a chim chhia a, heng hmunte hi buh chinna atana siam leh tur chuan kum eng emaw chen siamṭhat pawh an ngai dawn niin loneitu ṭhenkhat chuan an sawi .