Pakistan PM chetdanin sawi zui hlawh

Pakistan Prime Minister thar Imran Khan chuan inrenchemna policy kalpui a tum thu a sawi a, hei vang hian Prime Minister House official residence-ah pawh a cheng duh lo a, sorkar official-te chu an zinchhuahin thlawhtheihnaa first class-a chuan a khap bawk. President bakah sorkar hotute ngei pawh first class-a an zin khapsak an ni.

Hetihlai hian PM thar hian Islamabad-a Prime Minister chenna in leh, Banigala-a a private in inkara an kalna atan a nupui nen official helicopter an hmang a, hei hian sawizui a hlawh hle. PM Khan chu official-te chungchanga inremchemna policy a lekkawh laiin amah ngeiin a policy hi zawm thei lohah an puh.

Mahse Imran Khan-a party, Pakistan Tehreek-e-Insaf (PTI) chuan PM sawiselna hi chhang letin, ṭul loa PM thar beih an tumna hmanrua a ni, a ti. PTI hruaitu Muhammad Ali Khan chuan a twitter-ah hemi chungchang hi tarlangin, PM-in PM house leh Banigala-a a in inkara helicopter a hman chuan fuel man senso a tlem zawk niin a sawi. Motor-in kal ni se security te nen motor 5-7 tal hman a ngai dawn a, hetihlai hian helicopter chuan minute thum chauh an thlawk a, a hautak lo zawk a ni, a ti.