Suu Kyi-i Nobel Peace Prize lakir dawn lo: Nobel Committee

United Nations investigator report tihchhuahin Myanmar sipaiten Rohingya Muslim te an suat nia a tarlan avang ngawt chuan Myanmar ram hruaitu Aung San Suu Kyi-i hnena khawvel chawimawina sang, Nobel Peace Prize lo pek tawh chu lakkir a ni dawn lo tih Nobel Committee chuan a sawi.

Myanmar-a sipai rorel laia hun rei tak pawn chhuak thei loa house arrest-a hren, Suu Kyi-i hian an rama democracy tundin a nih theih nan theihtawp a chhuah a, kum 1991 khan Nobel Peace Prize hi hlan a ni. Mahse sipai sorkar tihtawp a, mipui thlan sorkar a din hnuah Suu Kyi-i party, National League for Democracy(NLD) chuan sorkarna changin State Counsellor-ah dah a ni a, sipaiten Rakhine state-a beihpui an thlak chungchanga a demna lam hawia thu a sawichhuah loh avangin sawisel pawh a hlawh phah hle.

Norwegian Nobel Committee secretary Olav Njoelstad chuan Suu Kyi-i hi kum 1991 thlenga democracy leh zalenna suala a beih avangin chawimawina hi hlan a ni a, tuna an party sorkarna hnuaia sipaite chetdan chungchang avangin he chawimawina pek tawh hi lakkir sak a ni dawn lo tih a sawi. Dan an siamah Nobel Prize pek tawhte lakkir phalsak an ni lo a ni, a ti.

Hetih lai hian UN human rights chief Zeid Ra'ad al Hussein chuan Rohingya te chungah sipaite chet dan avang hian Suu Kyi-i hian ram hruaitu a nihna aṭanga bang turin a phut tih a sawi. UN report-ah hian hun rei tak democracy tundin a nih theih nana lo beitu, Suu Kyi-i hi Rakhine state-a tharum thawhna thleng dang zo loah puhin an demna thu pawh an tarlang a ni.

Hussein chuan BBC-in a kawmnaah Suu Kyi-i chungchang hi sawichhuakin, "Thil ti thei tur dinhmunah a ding a ni" tiin, hetichung hian sipaite chetdan chungchangah aw a chhuah duh lo a, hei vang hian bang mai turin a phut tih a sawi.

Kum 2017 August thlaa Myanmar sipaiten Rakhine state-a beihpui an thlak vang hian Rohingya Muslim mi sang chuang an thi tawh a, mi nuai sarih chuang chu Bangladesh ramah an tlanchhe tawh bawk.