Myanmar sipaiten Suu Kyi-i thubuai dang panga siamsak leh

Myanmar sipai court chuan civil hruaitu, Aung San Suu Kyi chu helicopter lei leh hire-a puh chungchangah eiruk thubuai dang panga a siam belh sak leh.

Kar liam ta kartawp khan Suu Kyi-i thubuai siam tharte hi puangin, helicopter hire, enkawl leh lei chungchangah thubuai hi siamsak niin, Myanmar president hlui U Win Myint pawh heng thubuaite hi siamsak a ni vek bawk.

State newspaper Global New Light of Myanmar chuan Suu Kyi leh Win Myint-te hi minister hlui Win Myat Aye tana helicopter lei leh hire chungchangah financial rules-te an zawm loh avangin sorkarin sum a hloh phah a, hei vang hian thubuai siamsak an ni dawn tih nikum December khan a lo tarlang tawh a ni.

Minister hlui Win Myat Aye hian kum 2019-2021 atan helicopter a hire a, mahse rental hour 720-a darkar 84.95 chauh a hmang a ni, tiin newspaer chuan a tarlang. Sipaiten civil sorkar an paihthlak hnuah Win Myat Aye leh roreltu ṭhenkhatte chu an la bibo mek a ni.

Nikum February 1-a sipaiten civil sorkar thuneihna an hnehchhuh hnuah, Suu Kyi hi pawn chhuak thei loin hren a ni. Thubuai pawh eng emaw zat siamsak tawhin, heng zinga ṭhenkhatah chuan thiam loh chantir a ni tawh bawk. Thubuai thar siam belh zel a nih avangin house arrest-a hren chhunzawm zel a la nih a rinawm bawk.