France-a Teachers Union-te'n Covid inkaihhruaina dan duh lohna lantir

France rama zirtirtu pawl chuan sorkarin Covid testing leh isolation protocol a siam chu khawtlanga inthliarhranna lantirtu lian tak a nih theih thu sawiin, Thawhṭanni aṭang khan kar khat chhung awh tur lungawi lohna an lantir.

Kar liamta khan Teachers Union hian lungawi lohna lantirin kawng an lo zawh tawh bawk a, ramchhunga primary school zawng zawngte chu khar vek an ni. Union chuan zirlaite school an kal theihna tura dan mumal tak siam thei loah thuneitute chu an puh.

Zirtirtute hian hri inkaichhawn awl tak Omicron variant vangin class pawh an nei mumal theih loh phah tih sawiin, zirlai nu leh pate chuan an fate tan vaccine appointment hmuhsak a harsat thu leh pharmacy kawtah thui tak inthlar a ngaih ṭhin thu an sawi. Hemi chhanlet nan hian sorkar chuan high-grade FFP2 facemask maktaduai nga leh zirtirtute'n hri an kai palh emaw hri kaite nen an in contact palh emaw a thlen palah school staff leh aikal zirtirtu mi 3,000 chuang rawihbelh a remti bawk. Mahse rawtna hi union chuan duh khawp loin, kar leh Ningani hian ram pum huap nawrh huaihawt lian tham tak neih an tum. "Prime minister leh education minister intiamna piah lamah kan hriselna kawnga harsatna kan tawh lohnan ruahmanna ṭha zawk kan mamawh a ni," an ti.

Zirtirtute hian personal protection equipment pe tura an intiam zat aia tam pek belh an duh a, French education system tan sum tam zawk ruahman turin an beisei a, an rama zirtirtute hian Europe ramdanga mite aiin an hlawh tlem zawk tih an sawi.