Trump-an WTO aṭanga inhnuhdawhah vau

US President Donald Trump chuan World Trade Organization (WTO) in an ram a en dan chu a thlak danglam lo a nih chuan, he pawl aṭang hian US chu a inhnuhdawk mai dawn niin a sawi.

WTO hi khawvel huaupa insumdawn tawnna kawnga dan siamna atana din niin, ram hrang hrangten insumdawn tawnna lama harsatna an neihte chingfeltu a ni. Mahse President Trump chuan US laka WTO chetdan chu a dik tawk lo nia ngaiin, a lungawi lo a ni. WTO kalphung siam chu siamṭhat a nih loh chuan an tel zui dawn loh thu a sawi.

Ningani khan President Trump chuan kum 1994-a WTO dinna tura inremna siam chu trade deal siam tawha la chhe ber niin a sawi. US Trade Representative Robert Lighthizer pawhin WTO in buaina a chinfel danah US thuneihna chungchanga inrawlhah a lo puh tawh bawk.

Donald Trump hian US President a nih aṭang khan WTO hnuaia insumdawn tawnna kalpui dan chu dik tawk lo niin a lo sawi tawh a, nikuma Fox News-in an kawmnaah pawh, "WTO hi US ni lo ramdang zawngin an hlawkpui tura din a ni" tiin a sawi a ni.