Imran Khan-an army headquarters a tlawh

1st September, 2018

Pakistan Prime Minister thar Imran Khan chuan Ningani khan Rawalpindi-a army headquarters a tlawh.

July 25 inthlanpuia hnehna changtu, Pakistan Tehreek-e-Insaf (PTI) hotu Imran Khan hi inthlanpui neihah khan sipaiten an thlawp ṭha hle nia sawi a ni.

Ningani-a army headquarters a tlawh ṭum hian Defence Minister Pervez Khattak, Foreign Affairs Minister Shah Mehmood Qureshi, Finance Minister Asad Umar leh official dangten PM hi an ṭawiawm a ni.

Khan hi Chief of Army Staff General Qamar Javed Bajwa chuan a lo dawngsang a, defence, internal security leh venhimna lam kaihhawih thil pawimawh hrang hrangte an lo hrilhfiah niin sipai thupuangtu Major General Asif Ghafoor chuan a sawi.

August 18-a Pakistan PM 22-na atana lakluh a nih hnuah, Thawhṭanni khan General Bajwal hian PM thar hi a lo hmu tawh a, sipaten an ram venhimna an kalpui dante a lo sawipui tawh a ni.