US-in NKorea-a zin khap chhunzawm

US State Department chuan US citizen-te North Korea rama zin a khapnna chu kumkhat dang atan a pawtsei.

North Korea rama zin, US mite man leh hun rei tak tang tura hrem an nih leh ṭhin avangin US chuan zin hi alo khap tawh a ni. Hetih lai hian ram pahnihte hian an inkar boruak siamṭhat tum hian hma an la mek a, June thla khan US President Donald Trump leh North Korea ram hotu Kim Jong-un te chu Singapore-ah an lo inhmu tawh a ni.

Ram pahnih hruaituten meeting an neih hnu hian an inepna boruak pawh a dai deuh a, mahse meeting an neih ṭuma Kim-an Korean Peninsula-a nuclear ralthuam tihbo tuma a intiamnaah hma a la ṭha tawk lo niin US chuan a puh a ni. Hei vang hian kar hmasa khan President Trump chuan US Secretary of State Mike Pompeo-an NKorea ram a tlawh tur pawh a ṭhulh tir phah bawk.

US-in NKorea-a America mite zin a khapna hi kum 2017, September 1 aṭang khan hman ṭan a ni a, nimin khan he khapna hi a tawp a ni. Mahse State Department chuan kum khat atan pawtseiin, nakkum August 31 thleng hman zui a ni dawn a ni.