Electoral court-in inthlana Lula chuh a khap

Brazil-a Superior Electoral Court (TSE) chuan an ram president hlui, eiruk thubuaia thiam loh chantir vanga jail-a tang mek, Luiz Inacio Lula da Silva chu president thlanna neih turah a chuh a khap.

Kum 72 mi, Lula hi thamna laa puhna thubuaiah thiam loh chantir a nih avangin kum 12 tang tura hrem a ni a, jail-ah a tang mek a ni. Mahse hetichung hian an party, Workers' Party chuan party candidate atan a ruat tho a, mipui ngaihdan lakah pawh Lula hian hma a hruai mek a ni.

Brazil ram danah thubuaia thiam loh chantir tawhte chu inthlana an chuh khapsak an ni a, mahse Lula hian court-in thiam loh a chantirna hi ngaihtuah ṭha leh tura a appeal avangin an party chuan inthlana a chuh phalsak beisei hian candidate atan pawh an ruat lui tho a ni.

Mahse Inrinni khan judge pasarih awmna court chuan October thlaa President thlanna neih tura Lula chuh remtih a nih leh nih loh chungchang hi ngaihtuahin, judge paruk chuan a chuh hi an remti lo a, pakhat chauhin a remti thung.

Lula party Workers' Party (PT) chuan court thutlukna tihchhuah a nih hnu hian Lula chu President candidate atana pawm a nih theih nan an bei chhunzawm zel dawn tih an sawi. Candidate atana Lula dikna chanvo neihte pawmsak a nih theih nan court-ah an appeal dawn tih sawiin, kawtthlerahte Lula an thlawpna hi lantir an tum.

President hlui Lula hi a president laiin a apartment chei ṭhatna atan engineering firm OAS aṭangin thamna sum, dollar maktaduai 1.1 dawngah puh a ni. Mahse Lula chuan thil tih dik loh a nei lo niin a sawi thung a, an puhna te chu thuneihna a chan leh tur danna atana tih mai niin a sawi. Kum 2003-2011 chhunga Brazil President a nih lai hian Lula hian an ram sum dinhmun leh social programme te nasa taka siamṭhain, president aṭanga a ban lai pawh hian mipui ngaihdan lakah ram hruaitu tana duhtu hi 87% zet an la tling a ni.

Workers' Party chuan Lula tan beih zel an tum thu sawi mah se, Lula hian inthlan hi a chuh thei dawn ta lo a nih chuan PT presidential candidate atan hian Sao Paulo mayor hlui, Fernando Haddad chu a thlang tawh nia sawi a ni.