Pakistan PM House-a luxury vehicle lilam dawn

Pakistan sorkar chuan inrenchemna kalpui a tumna peng pakhatah Prime Minister House-a luxury vehicle-te chu September 17 hian a lilam dawn.

Prime Minister House-a luxury vehicle kawlte chu BMW pariat, 2014 model car pathum, 5000cc SUV pathum, 3000cc SUV 2016 model pahnih bakah Mercedenz Benz car pali niin heng zinga pahnih chu 4000cc bullet-proof an ni. Toyota car 16 a awm bawk a, pakhat chu 2004 Lexus car niin, 2006 Lexus SUV pakhat leh 2004 Land Cruiser pahnih a awm. Car pariatte chu 2003-2013 model an ni.

Pakistan Prime Minister thar Imran Khan chuan August 18-a lakluh a nih khan a kaihhruai sorkarin inrenchemna a kalpui tur thu sawiin, PM House-ah pawh a chen loh tur thu a sawi. Bedroom pathum awmna military secretary house-ah chhiahhlawh pahnih chauh neiin a awm a ni. PM House-ah hian thawktu 524 zet awmin motor hi 80 vel chhawp a ni bawk.