US-ah naupang mtd 9 chuangin Covid-19 kai tawh
United States (US)-ah Covid-19 hri len aṭangin he hri kai hi naupang zingah maktaduai kua chuang an awm tawh. Tun hnaiah naupang zingah hri kai hi an pung nasa hle niin American Academy of Pediatrics (AAP) leh Children's Hospital Association report chuan a tarlang.
Thawhlehnia report tihchhuahah US-a naupang, Covid-19 hri kai hmuh chhuah tawh hi 9,452,491niin, hei hi hri kai hmuh chhuah zawng zawng aṭanga 17.8% a tling a ni. Naupang nuai khat zingah 12,559 zelin hri hi kai ang an ni.
Kar liam ta chhung khan naupang hri kai thar hi maktaduai khat dawn an awm belh hman a, hei hi nikum thlasik laia hri len zual laia kar khata naupang hri kai hmuh chhuah zat aiin a let liin a tam. Kar liam ta chhunga naupang zinga hri kai punna hi 69% zet a tling.
US-ah hian a zawnin kar 23 chhung chu kar khatah naupang hri kai thar nuai khat chuang an awm tawh. Nikum September thla chawlhkar hmasa ber aṭang khan, naupang hri kai thar hi maktaduai 4.4 chuang an tling tawh a ni.
Hri kai damdawi-ina dah luh ngaih zingah naupang hi 1.7% - 4.4% vel an awm a, Covid hripui thihpui zingah naupang hi 0-0.26% an awm bawk.
England-in inkhunghran hun titawi
England chuan Covid-19 hri kai, in lam a inkhunghran ngaih chen chu ni ngaah a titawi.
Damdawi hnathawh dan hrang hrangte an ennawn hnuah, thuneitute chuan self-isolation hun hi ni ngaah a titawi a, mahse an inkhung tawp ni leh a ni ruknaah lateral flow test negative result an neih a ngai ang. Negative result an neih chuan nunphung pangngai anga an awm zui nghal phalsak an ni. Mahse ni nga leh ni ruknaa an la positive chuan negative result an neih hma an inkhung a ngai a, a nih loh chuan in test loin ni 10 thleng an inkhung thei bawk ang.
Health secretary Sajid Javid chuan inkhunghran hun tihtawi hian hnathawhna kawnga indaihlohna awmte pawh a tiziaawm dawn a, essential public service lama innawrna nasa tak pawh a tlem phah thei dawn tih a sawi.
Nikum December thla khan England hian inkhunghran hun hi ni 10 aṭangin ni sarihah a lo titawi tawh a ni. Hri kai tih hriatchhuah ni chhiar tel loin, a tuk aṭangin chhiar ṭan a ni ṭhin.