European Parliament-in President thar atan Roberta Metsola thlang

European Parliament (EP) chuan Thawhlehni khan Malta mi, conservative politician Roberta Metsola chu President thar atan an thlang a, president nilai kar hmasaa boral ta David Sassoli a thlak dawn a ni.

Malta lawmaker Roberta Metsola hi hmeichhe zinga EP president ni thei pathumna a ni.

Kum 43 mi, lawyer Metsola hi secret vote 690 aṭangin vote 458 hmuin, hneh taka thlan tlin a ni. A elpui pahnih Greens candidate, Alice Bah Kuhnke chuan vote 101 hmuin, Left candidate Sira Rego chuan vote 57 a hmu.

European law zir chhuak, Metsola hi kum 2013 aṭang khan European Parliament member a ni tawh a, November 2020 aṭang khan Vice president atan thlan a ni.

EP President atana thlan tlin a nih hnua thu a sawiah, Metsola chuan engtik lai pawha Europe tan ding tur leh mipui rorelna hlutna tundin te, zahawmna, dikna, inpumkhatna, intluktlanna, rule of law leh fundamental rights kenkawh a tum thu a sawi. "President atan David Sassoli hming chawi nung zel chungin Europe tan theihtawp ka chhuah ang" a ti.

"Kan ruahmannate kaltlangin mipuite chu inrintawkna leh phurna thar siamsak kan duh a ni. Ram muanawm, him, dik leh thianghlim takah an awm tih rinna siam thar chu kan tum a ni," tiin Metsola chuan, Europe chu mipuite zalen taka an awm theihna tura siam a duh thu a sawi.

Europe leh khawvelin chona a hmachhawn mek thu sawiin, Metsola chuan sik leh sa inthlak danglam chak tak chuan kan chenna khawvel a tichhe mek a, ṭhangtharte kuta dah mai tur kan nih tawh loh thu a sawi. "European Green Deal leh carbon-free continent hmasa ber siam chu kawng dik a ni," a ti. Sumdawnna kawngah sorkar puihna ring mai lo a, risk lian zawk lak ngam a pawimawh thu leh chu kawng chu Europe dinchhuah leh theihna tur a nih thu a sawi.