Indonesia-in an ram khawpui sawnna tur bill a pawm

Indonesia Parliament chuan Thawhlehni khan an ram khawpui chu Jakarta aṭanga Borneo thliarkara Kalimantan-a sawnna tur bill a pawm.

Khawpui sawn tur chungchang hi ram hruaitute chuan kum tam tak an lo buaipui tawh a ni. State capital law tharah hian USD tluklehdingawn 32 hu mega project, president Joko Widodo hmachhawp hrang hrangte tarlan a ni a, khawpui thara hmasawnna hnathawhna tur sum pek leh inrelbawlna kalpui dante pawh tarlan a ni.

Planning minister Suharso Monoarfa chuan, "Central hmalakna leh ram kalphung lantirna ṭha tak a nih bakah economic gravity hmunpui thar a ni thei dawn a ni," tiin bill chu law-a an hlan kai hnuah a sawi.

Khawpui thar sawn hna hi kum 2022 - 2024 inkara neih ṭan tur a ni a, kalkawng leh lawng chawlhna siam chu hna hmasaah neih hmasak a, hna ṭhenkhat chu public private partnership kaltlanga neih tura ruahman a nih thu finance ministry chuan a sawi. Mipui maktaduai 10 chenna Jakarta hi mipui inhnawhtawt tak, tui lian leh boruak chhia vangin sorkar chuan sawnchhuah a tum a, President tam tak chu he ruahmanna hi puitlin zo loin an lo hlawhchham tawh a ni.

President Joko Widodo hian khawpui sawnchhuak tura a ruahmanna hi kum 2019 khan a lo puang tawh a, mahse Covid-19 hri leng vangin hma an la zui nghal mai thei lo a ni. Khawpui thar hming atan Javanese term-a Indonesian archipelago sawina, Nusantara chu a thlang chhuak tawh a mahse, project an zawh hma chuan Jakarta hi an khawpui atan an la hman chhunzawm dawn a ni.

Khawpui thar siam hian supply chain chak zawk leh Indonesia chu khawvel ramdangte nena insumdawnna, investment leh technological innovation lamah kawng ṭha zawk a siamsak thei dawn a ni," tiin sorkar thuchhuak chuan a sawi.

Asia chhim lama economy lian ber ram hian an khawpui thar chu low-carbon "super hub" leh Java thliarkar piah lam thlenga hmasawnna ngelnghet siam thei tur a nih thu an sawi. Mahse sawiseltu lam chuan mipuite berawn lo leh environment lama nghawng a neih tur chhut lawk loah ngaiin an duh loh thu an auchhuahpui bawk a ni.

Nusantara hi minister nena intluktlang chief authority chuan a enkawl dawn tih bill special committee-a deputy chair Saan Mustofa chuan Thawhṭanni khan a sawi. Chief authority hmasa ber atan hian Jakarta governor hlui Basuki Tjahaja Purnama hming chu sawirik a ni bawk.