Taliban-ten China puihna ngen

Afghanistan-a Taliban sorkar chuan an sorkar chu ram dangten official-a an pawmpuina tura hma lak pui turin China a ngen.

Nikum August thla aṭang khan Taliban-te hian Afghanistan-a ro rel mah se, an sorkar chu eng ram mahin an la pawmpui lo a ni. Ram dangten Taliban sorkar an pawmpui theih chuan ram danga Afghanistan sorkar thil neih, USD tluklehdingawn 9 hu khawih chet theih loa hrek sak chu an hmang ve thei dawn a ni.

Taliban thupuangtu Bilal Karimi chuan, "Ram dangten min pawmpui theihna tura an phut ang chi pawh kan ti vek tawh a ni," tiin China chuan ram dangten Taliban sorkar an pawmpuina tura hma la a, hma hruaisak tura an duh tih a sawi.

Kar liam ta khan Taliban acting interior minister Sirajuddin Haqqani chuan China ambassador Wang Yu hmuin, hemi chungchang hi a lo sawipui tawh a ni. Haqqani hian Taliban sorkar a puihna kawngah China chu lawmthu a hrilh bawk.

US leh a thurualpui ram bakah, Russia leh China pawhin Taliban sorkar hi an la pawm lo a ni. An pawm loh chhan hi firfiaka chetna an thlen chhunzawm hlauhthawn vang leh, mihring dikna chanvo an palzut a, hmeichhiate lehkha zir an khapsak vangte nia sawi a ni. Taliban cabinet member ṭhenkhat chu US leh UN-in a hrek zingah an tel bawk.

Thuneihna an chan hnuah Taliban-te hian sorkar huamzau zawk leh hriatthiamna nei zawk siamin, hmeichhiate hnathawh leh lehkha zir pawh an phalsak dawn a, an ram chu firfiakten chetlakna atana an hman tur lakah an veng dawn tihte pawhin an tiam. Mahse ram dangte chuan an thusawite chu a takin an kalpui dawn em tih an thlir phawt dawn tih an sawi a ni.