Myanmar court-in journalist pahnih kum 7 tang turin hrem

Myanmar court chuan Reuters journalist pahnih chu Rohingya te chungchang an chhuinaah state secret act palzutah puhin, kum sarih tang turin a hrem.

Reuters journalist Wa Lone leh Kyaw Soe Oo te hi police officer-ten official document an pek an ken laiin man an ni. Journalist-te hian tih dik loh an neih loh thu sawiin, police-te hian man an nih theih nan thang an kam zawk niin an puh.

Wa Lone chuan thil tihsual an neih loh avangin an hlauh loh thu a sawi a, rorelna dik tak chu ala lang chhuak ngei dawn a ni, a ti. Journalist pahnihte hremna pek hi Myanmar rama press freedom palzutna nia ngaiin sawisel a hlawh hle.

Wa Lone leh Kyaw Soe OO te hi nikum December thla khan man niin, jail-ah tantir nghal an ni.

Reuters editor-in-chief Stephen Adler chuan court thutlukna siam chu Myanmar ram leh khawvel hmun hrang hranga press freedom tana ni lungngaihthlak tak a nih thu a sawi.

Hetih lai hian judge Ye Lwin chuan Yong court hnenah journalist pahnihte hian state himna tihchhiat an tum ngei niin a sawi a, state secrets act hnuaiah thiam loh chantir an ni tih a tarlang.

Kum 32 mi Wa Lone le kum 28 mi Kyaw Soe Oo te hian Rakhine state-a Inn Din khuaa sipaiten mi 10 an tihhlum chungchanga finfiahna te an lakhawm a, he thil an chhuinaah hian polcie officer pahnih chuan document pawimawhte an pe a, mahse heng document hi an lak hnu lawkah police-te hian an man zui leh nghal a ni.

Inn Din khuaa sipaite chetdan hi a hnuah thuneitute chuan an chhui zui ve leh a, inthahna a thlen ngei thu leh, he pawikhawihnaa inhnamhnawihte hremna pek ngei a tiam a ni.