Brazil-ah kum 200-a upa musuem a kang

Brazil rama scientific institution upa ber, Rio de Janeiro-a National Museum-ah Pathianni zan khan kangmei nasa tak a chhuak.

National Museum hi kum 1818 a din niin kumin kumtir lam khan a kum 200-na a lawm a, he museum-ah hian item maktaduai 20 chuang zet lakkhawm a awm a ni. Item lakkhawm zingah hian mummies, meteorites, rannung leh fossil hrang hrang a awm. He museum hi Portugal lal chhungkua ten chenna atana an lo hman ṭhin a ni.

Brazil President Michel Temer chuan an ram tana ro hlu musuem a kang chhia chu pawi a tih thu sawiin, Brazil mipui tana ni lungchhiatthlak tak a ni, a ti. Kum zahnih zet an hnathawh tawh leh an thil chhuina te chu an chan vek tih a sawi.

Musuem website-in a tarlan danin, museum-a item 20,000 chuang chu Brazil chanchin kaihhnawih a nih thu sawiin, heng zinga tam tak chu Brazil lal chhungkua-ten an pek a ni.