Israel PM-in Palestinian refugee fund tihtawp lawmawm a ti

US-in Palestinian refugee tana United Nations Relief and Works Agency for Palestine Refugees (UNRWA) kaltlanga ṭanpuina sum a pek ṭhin a titawp tur chu Israel Prime Minister Benjamin Netanyahu chuan lawmawm a tih thu a sawi.

Pathianni-a Isarel chhim lama thu a sawinaah, PM Netanyahu chuan Israel chuan Middle East leh Europe aṭangin Juda thlate mi sang tel a lakhawm a, mahse Palestinian-te chuan hetiang hian an ti lo a, kum 70 kalta aṭang khan raltlan dinhmun chu a ngaihtuah tak tak lo niin a puh.

UNRWA hi kum 1948-a indo hnua Palestinian mi tlanchhia leh hnawhchhuah, mi nuai sarih vel enkawlna tura din a ni a, mi maktaduai nga chuangte hnenah zirna leh chhawmdawlna te a pe ṭhin a ni.

Netanyahu chuan US-in sum pekte hi raltlante chhawmdawlna tura a dik taka hman tur a ni tih a sawi a, hei bakah hian raltlan awm zat hi UNRWA tarlan aiin an tlem zawk niin a sawi.

Mahse UNRWA chuan Palestinian raltlante dinhmun a ngaihtuah tak tak lo nia puhna chu a pha a, UN-in inkaihhruaina a siam ang taka an kal thu a sawi. Hei bakah hian raltlante harsatna chungchang chu Israel leh Palestinian-ten inremna hmanga an sawifel a ngai tih a sawi bawk.

US hian kar kalta Zirtawpni khan UNRWA hnena a fund pek ṭhin chu a hmanna a dik tawk lo nia sawiin dollar maktaduai 300 chu a pek chhunzawm tawh dawn loh thu a sawi. US hi a hma pawhin UNRWA donor lian ber niin, UNWRA budget aṭanga 30% vel zet hi a tumsak ṭhin.