Pakistan-in ‘Ten Billion Trees Tsunami’ a ṭan

Pakistan chuan sik leh sa inthlak danglam chakin harsatna a thlen ṭhinte do letna turin Pathianni aṭang khan thingṭiak phun campaing a nei ṭan a, kum nga chhungin thingṭiak tluklehdingawn 10 chuang phun hman an tum.

Prime Minister Imran Khan-a chuan 'Plant for Pakistan' campaign hi Khyber-Pakhtunkhwa province-ah a hawng. He campaing hi 'Ten Billion Tress Tsunami' tih vuain, kum nga chhung chu ramchhung hmun hrang hrangah thingṭiak phun beihpui hi thlak chhunzawm a ni ang.

PM Khan chuan thingṭiak phunin, an ram mipuite pawh thing phun uar turin a fuih. GreenPakistan an kalpuina tur hmang hian sik leh sa inthlak danglam chakin chhiatna a thlente leh, boruak bawlhhlawh pung zel pawh an do let thei dawn tih a sawi.

Khan-a advisor Malik Amin Aslam chuan thingṭiak hi ramchhung hmun hrang hrangah a thlawna sem a nih thu a sawi. A thawh khatna atan khawpui lian hrang hrangah thingṭiak hi maktaduai 1.5 vel phun tura ruahman a ni.