UN-in Reuters journalist-te chhuah turin Myanmar a phût

United Nations rights chief Michelle Bachelet-i chuan Myanmar court-in Reuters journalist pahnihte kum sarih tang tura a hrem chuan a ṭhawng hle tih a sawi a, heng journalist-te hi chhuah nghal tur hian Myanmar sorkar chu a phut tih a sawi nghal bawk.

Chila President hlui, UN High Commissioner for Human Rights hotu thar Bachelet-i chuan journalist-te thubuai ngaihtuah a nih dan chu rorelna dik lo taka kalpuina a ni tiin, journalist pahnihte chu thu delhkilh awm loa chhuah nghal tura a phut thu a sawi.

Kum 32 mi Wa Lone leh kum 28 mi Kyaw Soe Oo-te chu Rakhine state-a Rohingya Muslim-te chunga sipaite chetdan an chhuinaah state secrets acts palzuta puhin nikum December thla khan man an ni a, Yangon-a Insein tan-inah tantir an ni. Thawhṭanni khan court chuan an thubuai hi ngaihtuahin, kum sarih ve ve tang turin a hrem a ni.

Journalist pahnihte hrem an nih chungchang hi UN, EU leh US bakah media leh rights group hrang hrangten an sawisel nasa hle. Myanmar hruaitu Aung San Suu Kyi-i chu hemi chungchangah hian a ṭawngchhuak loh avangin dem pawh a hlawh phah hle bawk. Mahse Myanmar sorkar chuan Suu Kyi-i thlavang hi a hauhsak nghal a, deputy minister of Information Aung Hla Tun chuan judicial system sawisel chu court zah lohna lantirna nena thuhmun reng a nih avangin, Suu Kyi-i hian court rorel dan chu a sawisel duh a rin loh thu a sawi.