Brazil museum-a thil lakkhawm 90% kangral

Brazil rama Rio de Janeiro-a kum 200 zet upa National Museum-a kangmei chhuakah museum-a thil awm 90% zet a chhia niin official-ten an sawi.

He museum-ah hian item maktaduai 20 vel zet dahkhawm a ni a, America-a anthropology leh natural history collection lian ber zinga mi niin, heng zingah hian kum 12,000 zet kaltaa ami, hmeichhe pakhat 'Luzia' ruang pawh a tel.

Brazil President Michel Temer chuan National Museum din thar lehna tur hian sorkar chuan company leh bank aṭangin ṭanpuina a dil mek tih a sawi a, Education Minister Rossieli Soares chuan ramdang puihna pawh an dil bakah, UN cultural body, Unesco nen pawh inbiakna neih nghal a nih thu a sawi.

Soares chuan museum din thar leh a, a thil lakkhawmte siamṭhat leh nan hian sorkar chuan an ram pawisa reais maktaduai 15 ( dollar maktaduai 3.6) a dah nghal niin a tarlang.

Museum kan chhan chhui chiangtu tur hi din nghal a ni a, hetihlai hian Cultural Minister Sergio Leitao chuan electric kalsual vang emaw, museum chunga hot-air balloon tlak vang emaw a nih theih thu a sawi. Pathianni zan khan kum zabi 19 hunlaia Brazil lal chhungkaw chenna in ni ṭhin, museum-a hman zui takah hian kangmei nasa tak a chhuak a, museum pawh hi khar nghal a ni rih a ni.

City fire chief Roberto Robadey chuan kangmei chhuak ṭhelh tura emergency service an thlen chuan museum bula hydrant-ahte chuan tui a lo awm lo a, hei vang hian thawktute chuan a bul dila tui leh tanker truck ami te an thiar chawp a ngaih phah niin a sawi. Hna a thawh ve tawh chhunga a tana hun tawn hrehawm ber a nih thu a sawi.

Mi tam tak chuan museum enkawlna tur sum pek tihtlem a nih vangin kangmei hi a chhuah phah niin an sawi a, kangmei a chhuah hnu Thawhṭanni khan mi ṭhenkhat thinrim pungkhawmin museum-ah hian luh luih an tum a, riot police-ten tear gas hmanga an hnawhdarh a ngai hial a ni. Museum deputy director Luiz Fernando Dias Duarte chuan Brazil thuneitute chuan musuem enkawl hna chu an ngaihthah hle niin a sawi a, thil hlu tak tak an lakkhawmte vawnghim tur chuan sorkarah pawh an lo bei fo tawh tih a sawi a ni. Duarte chuan kumin June thlaa siam tawh, dollar 5.3 hmanga museum chei ṭhatna tur ruahmanna an siam chuan kangmei chhuak lakah pawh hian a veng thei dawn niin a sawi a, mahse he hna hi October thlaa inthlan neih zawh hnuah thawh theih tur chauhah dah a ni, a ti.