Pakistan in President thar tur thlang

Pakistan President 13-na tur chu nimin khan Parliament leh provincial assembly pali member-ten an thlang.

President thar thlannaah hian rorellai Pakistan Tehreek-e-Insaf (PTI) chuan Arif Alvi an nominate a, Pakistan Peoples Party (PPP) chuan candidate atan Aitzaz Ashan an ruat bawk. Eptu pawl dang, Pakistan Muslim League-Nawaz (PML-N), Muttahida Majlis-i-Amal (MMA), Awami National Party (ANP), Pakhtunkhwa Milli Awami Party (PkMAP) leh National Party-te chuan candidate inṭawm siamin, Maulana Fazl ur Rehman an ruat a ni.

Parliament leh provincial assembly member-te hian nimin zing dar 10 aṭang khan president thar thlangin vote an thlak a, tlai dar 4 thleng vote thlak hun hawn a ni. President thlangtu electoral college-ah hian lawmaker 706 awmin, an zingah hian senator 104, national assembly member 342 leh provincial assembly member 260 an awm.