US President State of the Union Address Rin lawk angin sawi zui tur a tam

United States Presi­dent-te'n calendar year ṭantirha kumtina an house pahnih joint session-a thu an sawi ṭhin, State of the Union Address chu Thawhlehni zanah khan US president 45-na Donald Trump chuan Capitol Hill, Washington D.C-ah a nei.

Donald Trump thu­sawina hmun hi Democrats thuneihna House of Re­presentatives-ah a ni a, nikum December-a im­peach a nihna hmun tho kha a ni bawk.

Darkar khat leh minute 18 zet thu a sawi a, Trump thusawi inkhawmah hian boruak a sosang a, thil chhinchhiah tur hrang hrang a tamin, sawizui tur pawh a tam leh hle.

Trump hi impeachment trial nei lai mek a ni a, kar hnih chuang liam ta aṭang khan Senate hian trial hi an ṭan tawh a, an ram huna nimin (Nilaini) tlai dar 4-ah khan vote lak a ni ang.

Donald Trump chuan Middle East-a America-in indona hrang hrang a hmachhawn tihtawp a nih theih nan US chuan hma a la tih a sawi.

ISIS hmunpui za a za tihchhiat a ni tawh a, ISIS hruaitu leh dintu thisen chhuah chaka khat al-Baghdadi chu a thi tawh tih a sawi a, hemi a sawi zawh hian kut beng thawm a ring hle. Hun rei lote chhungin an economy chuan hma a sawn tih leh hnungtawlh zawngin an kal leh tawh dawn lo tih a sawi bawk a ni.  

8    A impeachment chungchang engmah a sawi lang lo.

8    Trump-a'n thu a sawi ṭan dawn hian House Speaker Nancy Pelosi chuan chibai a tum a, Trump hian a chibai duh lo a ni.

8    Thu a sawi zawh hian Nancy Pelosi chuan Trump thusawi copy ni ngeia lang chu a pawt thler.

8    House Democratic hmeichhe ṭhenkhat chuan kum hmasa lam ang bawkin thawmhnaw var an inbel leh. Hei hi kum 100 liam taa hmeichhiate'n vote an neih ve theihna tura an dikna chanvo an sual chhuah hriatrengna a ni.

8    Democratic politician tam tak chu Trump dodalna lantirna atan inkhawmah hian an tel lo.

8    Trump thusawi tura koh a nih lai hian Republican lam chuan "four more years" tiin an lo chham rual.

8    Britain Brexit Party leader Nigel Farage chuan Trump thusawi hi a hmunah a ngaithla.

8    Venezuelan opposition leader Juan Guaido pawh hmuh tur a awm.

8    State of the Union Address hi Trump hian a ṭum thum neihna a ni a, house pahnih joint session-a thu a sawi vawi lina a ni bawk.

8     President impeach zinga  State of the Union Address nei thei pahnihna a ni. 1999 khan impeachment trial neih laiin Bill Clinton khan State of the Union Address hi a lo nei tawh a ni.