East Jerusalem-a in sak hna chawlhsan turin Israel ngen

France, Germany, Italy leh Spain rama foreign ministry-te chuan Nilaini khan Israel thuneitute chu East Jerusalem-a Juda chenna tur in a sak chu chawlhsan turin an ngen.

Israel thuneitute chuan tun thla tir lam khan Palestinian rama luah, East Jerusalem-ah chenna in 3,500 sak tharna tur an pawm a, heng zinga a zahve vel hi hmun sawisel hlawh tak Givat Hamatos leh Har Homa-a sak tura tih an ni.

Europe ram palite chuan thuchhuah an siamah, building thar tam tak siam hian "two state solution" nei tura an hmalaknaah harsatna lian zawk a thlen theih thu sawiin, Palestinian state siam turin ramdangte nena inremna siam a pawimawh thu an sawi. Heng hmuna building thar sakah hian West Bank leh East Jerusalem inthlunzawmnna a tichhe thei a, international law bawhchhiatna a nih thu an sawi.

Israel chuan kum 1967 indonaah khan East Jerusalem leh Old City hi lain, an luah zui a ni. Mahse Palestinian ram a luahsak hi tun thlengin ram dangte chuan an la pawmpui lo a ni. Palestinian-te anmahni ram hran din an tum mek laia an ram china Israel-in Juda mite inbenbelna tura lo siamsak ṭhin chu dan kalh a nih thu an sawi a, Israel mite chu dan loa khawsa tiin an dem thu an sawi fo a ni.

Palestinian-te hian West Bank-ah Palestinian ram hran din a, East Jerusalem chu khawpui atan hman an duh a ni. Hetih lai hian Israel chuan Jerusalem chu hman lai aṭanga Israel ram khawpui a ni a, ṭhendarh theih a nih lo a ti thung.

Ram palite hian East Jerusalem ram ṭhenawm, Sheikh Jarrah-a Israel sipaiten Palestinian chhungkuate an hnawtchhuah leh an chenna an tihchhiatsak chu pawi an tih thu an sawi bawk. Nilaini khan Israel police-te chuan East Jerusalem-a cheng, Palestinian chhungkaw khat chu an chenna in chhuahsan tirin, an in an tihchhiat sak a ni. Hei hi rights activist leh ram dangte an sawisel nasa hle.