France senator-te'n sport inelnaah hijab khap an rel

France Senate chuan sports competition-a Muslim hmeichhiaten lu tuamna,hijab an khum ṭhin chu khap an rel a, infiamnaah intluk tlanna lantir a pawimawh thu an sawi.

French upper legislative house chuan Thawhlehni khan sports federation hnuaia infiamna hmunah sakhaw chhinchhiahna lantir khapna tura dan siamṭhat hi an rawt a ni. Senator-te chuan infiamnaa lu khuhna hman hian infiammi dangte dinhmun hlauhawmah a siam a ni, an ti.

He rawtna hi right-wing group Les Republicain chuan pu lutin, sorkar lam chuan a lo dodal thung. Mahse vote lakah hijap khapna siam ṭha ti lamah vote 160 tla in, he dan thlawp lo lamah vote 143 a tla thung. Commission-a Senate leh lower house member te chuan rawtna hi kenkawh anih hma in inremna an siam a ngai a, he rawtna hi nuai bo theih a la ni bawk.

He khapna dan hi tihputling a nih pawhin kum 2024 Paris Olympics-ah hman a ni dawn em tih a la hriatchian loh. Hemi chungchangah hian Olympic organising committee lam pawhin engmah an la sawi lo.

French football federation chuan hmeichhiate chu official match-ah hijab khum a lo khap tawh a, an pawl hnuaia inelna hrang hrangah pawh lu tuamna khum hi an lo khap tawh a ni.