Pakistan President atan Dr Arif Alvi thlang

Pakistan President 13-na atan rorellai, Pakistan Tehreek-e-Insaf (PTI) candidate Dr Arif Alvi chu thlan a ni.

Ningani khan Pakistan Parliament leh provincial assembly pali member-ten an ram president thar tur hi an thlang a ni. PTI candidate Dr Arif Alvi hian electoral college vote 432 zinga 212 a hmu a, eptu

ṭangrual candidate Maulana Fazlur chuan vote 131 hmuin, Pakistan Peoples Party (PPP) candidate Aitzaz Ahsan huan vote 81 chauh a hmu pha.

President atana thlan tlin a nih hnua thu a sawiah, Dr Arif Alvi chuan PTI hotu leh an ram Prime Minister Imran Khan-a chungah lawmthu a sawi a, PTI president chauh ni loin, Pakistan ram mipui leh party hrang hrangte president a nih tur thu a sawi. Mi retheite dinhmun siamṭha tura theihtawp chhuah a tum thu a sawi bawk.

Kum 69 mi, Dr Arif Alvi hi a hming pum chu Dr Arif ur Rehman Alvi a ni a, PTI dintu zinga mi niin PM Imran Khan nena inpawh ṭha tak an ni. Dentist niin, dentist zinga khawvela ram khat hruaitu ni thei pahnihna a ni bawk. Dr Alvi hi Asia-Pacific Dental Federation president leh Pakistan Dental Association hotu pawh a lo ni tawh a ni.

Pakistan President thar Dr Alvi-a pa, Dr Habib ur Rehman Elahi Alvi pawh kha dentist niin, India leh Pakistan ṭhenhran a nih hma khan India Prime Minister hmasa ber, Pandit Jawaharalal Nehru-a personal dentist a lo ni tawh a ni.