Lahore HC-in Imran Khan laka petition thehluh pawm

Pakistan-a Lahore High Court chuan National Assembly-a Prime Minister atana Imran Khan thlan a nih khan member eng emaw zatin vote an thlak lo nia sawiin, PM thlan a nih dan chu ram danpui kalh a ni tia puang tura petition thehluh chu a pawm.

Lahore High Court-a petition thehluhah hian PM thlanga vote thlaknaah hian National Assembly member 69 vel an tel lo niin an tarlang. Petition thehluttu, Sheikh Zahid Mahmood chuan an ram danpuia Article 91(4)-ah chuan PM thlan dawn hian National Assembly member tinten vote an thlak a ngai tih tarlan a ni, a ti.

PM thlannaah hian Bilawal Bhutto Zardari kaihhruai, Pakistan Peoples Party (PPP) member 54 te chuan vote an thlak lo a ni. Imran Khan hian vote 176 hmuin, a khingpui awmchhun Shahbaz Sharif chuan vote 96 a hmu thung. Member 342 awmna Parliament lower house, National Assembly-ah hian sorkarna siam turin vote 172 hmuh phak a ngai.

Imran Khan hian PM atana thlan tlin a nih hnuah member 21 awmna cabinet pawh a puang nghal a, cabinet minister zinga tam zawk hi military dictator hlui, General (retd) Pervez Musharraf-a rorel laia a minister te an ni.

August 18 khan Imran Khan hi Pakistan Prime Minister 22-na atana lakluh a ni a, Pakistan President Mamnoon Hussain-an rinawmna thu a tiam tir a ni.