Japan-ah typhoon Jebi tleh vangin mi pakua thi

Japan ramah thlipui na tak, typhoon Jebi a tleh a, thli tlehin chhiatna a thlenah mi pakua an thi a, mi 3,000 chuang airport-ah an tangkhang bawk.

Thawhlehni tlai lam khan typhoon Jebi hian Japan khawthlang lam tuipui kam a nuai a, ruah nasa takin a sur zui bawk. Thli hi darkar khata km 216 vela nain a tleh a ni. Thlipui tleh hian in chungte a lak bakah, lei-a truck dingte a len tlu a, Osaka Bay-a ton 2,591-a rit tanker ding pawh Kansai International Airport panna leiah a len sawn thei a ni.

Airport panna lei pawh a tihchhiat avangin Thawhlehni zan khan airport-ah hian mi 3,000 vel an tangkhang niin transport ministry official chuan a tarlang. Airport runway leh basement te pawh tuiin a chim bawk a ni.

Nimin zing khan airport-a tangkhangte hi lawng hmangin hruaichhuah an ni a, he airport hawn hun tur hi hriatchian a la ni lo. Flight 800 dawn cancel a ni a, heng zingah hian international flight pawh eng emaw zat a tel.

Thlipui tleh hnu hian chhungkaw maktaduai 2.3 vel chuan power supply an nei lo a, nimin khan dawr, factory leh school te pawh khar a ni. Prime Minister Shinzo Abe chuan thlipui tlehna biala awmte chu hmun him lamah a rang thei anga insawnchhuak tura tiin, sorkar chu mipuite venghim tura a theih anga hma la turin a ti bawk.