Philippine President-in senator ngaihdamna sut

Philippine President Rodrigo Duterte chuan an rama eptu pawl senator Antonio Trillanes ngaihdamna chu a sut a, man turin thupek a tichhuak.

Kum 15 kaltaa sorkar paihthlak tuma beihnaa inhnamhnawiha puh, eptu pawl senator Antonio Trillanes hi kumin khan President hlui Benigno Aquino chuan a lo ngaidam tawh a ni. Trillanes hian President Duterte hi a sawisel fo a, a thil neihte thup ṭhenah puhin, an rama pawikhawihtu leh ruihhlo zuar mi tam tak tihhlumnaah inrawlhah puhin International Criminal Court (ICC)-ah pawh complaint a thehlut tawh a ni.

Trillanes hi man anih chuan Duterte a president hnua seat 24 awmna Senate-a member man pahnihna a ni ang. A hma hian justice secretary hlui Leila de Lima chu jail chhunga ruihhlo zawrh chungchanga inhnamhnawiha puh anih vangin thla 18 chhung man a lo ni tawh bawk.

Senator pahnihte hian President Duterte-an an rama ruihlo zuarte laka beihpui a thlak chungchanga police-te chet dan chu an sawisel fo a, Senate-in thil awmdan a chhuichianna pawh an ho a ni. Mahse Duterte chuan an puhna te hi pha in, thil tih dik loh engmah a nei lo niin a sawi thung.