Sept 18-20-ah Korea ram pahnihin summit nei dawn

North leh South Korea ramte chuan September 18-20 chhung hian North Korea khawpui Pyongyang-ah summit an nei dawn.

South Korea official chuan summit neih turah hian Korean peninsula aṭanga nuclear ralthuam tihbo chungchangte ngaihtuah a ni dawn tih a sawi. NKorea hotu Kim Jong-un chuan peninsula aṭanga nuclear ralthuam tihbo a tumna chu a taka tihhlawhtling turin a bei dawn tih a sawi leh a, hemi atan hian South Korea leh US te pawh thawhpui an inhuam thu a hrilh niin South national security adviser, Chung Eui-yong chuan a sawi.

Pyongyang-a Kim Jong-un an hmuh ṭumin Kimchua SKorea official-te hnenah US President Donald Trump chu a la ringtawk reng tih sawiin, Trump-a president term chhung hian Korean peninsula-a nuclear ralthuam tihbo a, US leh NKorea inkar boruak ṭha lo pawh siam ṭhat hman ngei a beisei thu a lo hrilh a ni.

Korean summit neih hun tur chungchang tifel tur hian Nilaini khan South Korea President Moon Jae-in chuan a security adviser Chung leh midangte chu Pyongyang-ah hian a tir a, a hun tur hi an ruatfel nghal a ni. September 18-20 chhung summit neih tur hi kumin chhunga inter-Korean summit neih vawi thumna tur a ni ang.