Israel court-in Bedouin village tihchhiat a remti

Israel court chuan Palestinian ram a luah, West Bank-a Bedouin thingtlang khua chu sipaiten an tihchhiat sak a remti a, hei hi Palestinian leh rights group hrang hrangten an sawisel zui nghal.

Palestinian Authority chuan Bedouin hnam mi180 vel chenna, Khan al-Ahmar khaw tihchhiat phalna Israel court-in a pe chu a dem thu sawiin, he thutlukna hian Israel-in Palestinian ram laksak zel a tumna a tilang chiang hle a ni, a ti.

Khan al-Ahmar khua hi Jerusalem aṭanga hla vak lo niin, Juda-te chenna tur hmun, Maale Adumin leh Kfar Adumin inkara awm a ni. Israel sorkar hian Juda te chenna hmun hi zauh belh zel a duh nia sawi a ni.

Israel Defence Minister Avigdor Lieberman chuan court thutlukna chu fakin, thutlukna huaisen tak an siam avangin Supreme Court judge-te chu lawmpuina a hlan nghal. Tumah dan chunga leng an awm lo tih sawiin, tumahin an ram dikna leh thuneihna lantirna kawngah an dal thei lo ang, a ti.

Israel sipaite hian kumin July thla khan Khan al-Ahmar-a in leh puan in eng emaw zat an lo ṭhiahsak tawh a ni. He khuaa chengte hi km 12 vela hlaa awm, Palestinian khua Abu Dis-ah sawn tum an ni.