Japan ramah magnitude 6.7-a nain lir a nghing

Japan ram chu thlipui na tak, typhoon Jebi-in a nuai hnu lawkah, nimin zing khan an ram hmarlama Hokkaido thliarkarah magnitude 6.7-a nain lir a nghing leh. Lirnghing hian leimin nasa tak siamin in pawh eng emaw zat a chhilh a ni.

Nimina lirnghing vanga chhiatna thlengah hian mi pahnih an thi a, chin hriat lohin mi 40 vel an awm bawk. Lirnghing vang hian chhungkaw maktaduai thum chuangin power supply an neih loh phah a, nuclear plant pawh khar a ngaih phah bawk.

Thuneitute chuan lirnghing nawn leh, afterschock a la thleng leh thei tih sawiin, mipuite chu inring turin an chah. Nimin zinga lirnghing vang hian tuifawn nasa tak, tsunami erawh a thlen a hlauhthawnawm lo niin an sawi.