US President-in sorkar kharah a vau

US President Donald Trump chuan Congress chuan border security kalpuina tur sum mamawh ang a pe thei lo a nih chuan US sorkar chu khar (shut down)-ah a vau.

President Trump hian White House-a Republican hruaitute nena meeting an neihnaah hemi chungchang hi a sawichhuak a, fund pek hun tur pawh hi September 30 thleng atan a pawtsei bawk.

Trump chuan funding chungchangah Congress chuan hma a sawn chhho zel tih a sawi a, mahse hemirual hian border security fund chungchanga a lo tiam tawhte chu tihpuitlin ngei a duh thu a sawi. Congress-hian Mexico nen an ramri hungna bang siamna tur sum mamawh zat a telh lo a nih chuan funding legislation-ah a hming a ziahlan a duh lo ang tiin Trump hian a lo vau fo tawh a ni.

"Border security chungchang a nih chuan eng thil pawh tih ka inhuam a ni. Kan ramrite hi kan venhim a ngai" tiin, Trump chuan a sawi. Hemi rual hian sorkar khar chu a duh bik lo tih a sawi a, mahse kawng dang a awm loh chuan tih mai a ngai dawn a ni, a ti.

Senate Republican leader Mitch McConnel chuan President Trump hi meeting neihpuiin, thu ṭha takin an sawidun a, funding bill pawh president hian fiscal year tawp hma ngeia a sign a beisei thu a sawi. Sorkar khar a ni dawn lo tiin a sawi bawk. "Ramri hungna bang siam hi ṭha kan ti reng a, hemi atana sum hmuh pawh kan duh a ni. Mahse hemi chungchang sawihona hun ṭha ber chu inthlan zawhah niin kan ngai a ni", tiin a sawi.